Knattspyrnufélagið Elliði bikarmeistari 2009

Laugardaginn 12. september fór fram bikarúrslitaleikur Egils-gull deildarinnar. Haukar U, sem unnu Vatnaliljur í undanúrslitum, öttu kappi við Elliða, sem slógu UFC Ögna út í undanúrslitum. Leikurinn fór fram í Kórnum í Kópavogi og það var ekki eitt autt sæti í stúkunni; mætingin var vonum framar.

Bæði lið voru með vel mönnuð lið og þéttan bekk. Frá fyrstu mínútu mátti sjá að bæði lið voru klár í leikinn. Fyrri hálfleikur var varla hálfnaður þegar Haukar U skora mark. Þéttingsfast skot fyrir utan teig sem leikmaður Elliða reynir að skalla frá en knötturinn endar í þaknetinu - óverjandi. Staðan 1-0 fyrir Hauka U og þannig stóðu leikar í hálfleik.

Seinni hálfleikur byrjaði af krafti og Elliði var líklegri aðilinn til að skora mestan partinn. Þegar um 15 mínútur voru eftir af leiknum jafnar Elliði og loksins einhver spenna kominn í leikinn. Þegar örfár mínútur voru eftir af eðlilegum leiktíma kemst Elliði yfir 2-1 og hélt þeirri stöðu þar til enda leiks.

Elliði er s.s. bikarmeistari 2009. Elliði var síðast bikarmeistari árið 2006.